#من_ديوان_الحناوي
( التعلب فات فات )
----------------------
التعلب فات فات
والفيروس من سكات
عمال يخلق أزمات
الواد شايلينه ومات
والحزن في دارهم بات
وكورونا خد وهات
مش هامه أي عياط
والدمع في المقلات
والنعي علي الصفحات
بص وشوف يا عرفات
فيه حد تاني مات
يرحم ربي الأموات
التعلب فات فات
والدنيا هس سكات
في الشارع والحارات
والناس نازلين حكايات
مع إن الفيروس فات
وخطف مننا باشوات
طبيبات وممرضات
وكمان عدة لواءات
لكن صبرنا بالذات
بيكسر في الأزمات
يرحم ربي الأموات
التعلب فات فات
والدار مليانه صوات
وصراخ وزعيق وآهات
يا كورونا دا فيه حاجات
بتخفف م الأزمات
وتصب عليك لعنات
فارقنا من سكات
فيه حد تاني مات ؟
أنا خايف من لحظات
يقولولي دا صاحبك مات
يرحم ربي الأموات **
التعلب فات فات
والحزن بقاله ساعات
والموت دا له محطات
رجاله شباب ستات
الكل رهين إشارات
و كورونا حط وبات
ومقرب عالبلدات
الدور على مين بالذات
على ماجده ولا نجاة
يرحم ربي الأموات
التعلب فات فات
مر على بيوتنا هات
قغاز وكمان كمامات
اسحب م البنك وهات
جنيهات ولا دولارات
مين يضمن في الأزمات
تتوفر كل حاجات ؟
الحظر فاضل له ساعات
الحق نفسك وهات
قبل زيادة الأزمات
يرحم ربي الأموات
التعلب فات فات
وكورونا في ست ساعات
في إيطاليا دي بالذات
الموت من كل فئات
الداء لافف لفات
رافع إيدو بإشارات
مين حي ومين مات
الحي رافع شعارات
ومالوش أي طلبات
والموتى بالآلافات
يرحم ربي الأموات
--------------------
بقلم د / عبد الرحمن فتحي الحناوي .
من مصر .
ليست هناك تعليقات:
إرسال تعليق