فاض الهم بيك
============
إللي عايش طول حياته يحلم إنه يعيش سعيد
إللي مجروح من سكاته والوجع جواه يزيد
ياللي بالاحوال دي راضي
ولسه عادي دا كله ليك
هو قلبك يا ابني فاضي
ولا فاض الهم بيك
تبتسم للي خانوك واللي باعو واللي ضحو
واللي صحو جو منك كل أنواع الألم
لما قالو هيسبوك صح فرحو لما يمحو
كل دا بجره قلم
والألم جواك يزيد
وانت مش بيبان عليك
قالو يمكن قلبه فاضي
وانت فاض الهم بيك
===============
ياللي طيب
ياللي قلبك رغم حزنه ورغم همه
طبعه بين الناس أصيل
دا اللي زيك ياابني خلصو
أو وجودهم مستحيل
ماانت مهما الحزن كسرك
بين ضلوع قلبك تشيل
واللي خان هو اللي خسرك
أصل عمره ما كان أصيل
بس مهما الغدر صابك
عمر ما دا هز فيك
قولي إيه بس اللي نابك
من قلوب بتهز فيك
والألم جواك يزيد
وانت مش بيبان عليك
قالو يمكن قلبه فاضي
وانت فاض الهم بيك
==============
✍️ احمد طلبه
ليست هناك تعليقات:
إرسال تعليق