بَاغِي نَتْسَلْ مَنْ دُوَّارْ الذَّلْ.
°°°°°°°°°°°°°°°°°°°°°°
مَنْ كَرْشْ مِّي
وَأَنا فَقْمَاطِي
لاَ تْخَلِّيوْ خْرُوقْ
الذَّلْ تْغَوَّتْ وَتْطَاطِي
خَلِّيوْنِي نَتْسَلْ مَنْكُمْ
نْجَاوَبْ تَعْيَاطِي
فْجُوفِي مُوسْ مَاضِي
يْمَزَّڱْ فَرْبَاطِي
بْغِيتْ نَسْمَعْ كْلاَمْ
جْدِيدْ مَا فِيهْ نْقَاطِي
نَشْرَبْ بْرُودَة تَرْوِي
ظَلِّي وْغَلِّي وِتْمَاطِي
مَنْ عَيْنِيَّا ضْبَابِة
شْحَالْ وْهِيَ فِيَّا تْشَاطِي
كْرَهْتْ قْبِيلَة حَضْنَتْ
عَزِّي فْذَلْهَا
وَصْعَابْ فِيهَا تَحْطَاطِي
وَ مَرْجَتْ الْبِيضَة
وَتْفَرْكَتْ الْعَشْ لْمَوَاطي
قْبِيلْتِي جَاتْ فَلَكُدْيَة
الرِّيحْ اللِّي جَاهَا مَلاَّطِي
لاَ سْوَاقِي بْقَاتْ جَارْيَة
ولاَ نْوَادَرْ مَشْدُودَة بَسْمَاطِي
وَشِيخْ لَقْبِيلَة مْكَّرَّشْ
عْلِينَا بَمْشَاطِي
حَوَّطْ الْبِيرْ بَجْلاَيْلُو
وَبْقَى لَعْطَشْ فِينَا يْوَاطِي
وْدَابَا هَا لْعَارْ لاَ تْنَوْضُوا
حَرِّي وَشْيَاطِي
خَلِّيوْنِي نْبَعَّدْ فَبْعَادِي
لاَ تَقْرَاوْ عْلِيَّا دَمْيَاطِي
عَزِّي تَحْتْ إِيبَاطِي
وْمَا سْمَعْ حَدْ عْيَاطِي.
إدريس بندار
°°°°°°°°°°°°
ليست هناك تعليقات:
إرسال تعليق