ساهر ليلي مع نهاري فالتخمام...ظلام عليا الحال والغيم تكدر
قولي لي واش القضا يا زين اريام....افشل لساني وماعاد يخبر
ادعيتك ترضى ونرجع زوج توام...ما يفرقنا لا عدو لا قول غدر
نبنو سور متين ما يرضى تهدام...بني معزر بين قلبين مقدر
ما تجرحنا سيوف ما تلحق اسهام....ونعيشو ذا العمر مكتوب مسطر
يا طفلة نبغيك ياك الكذب حرام...ولساني ما طاق علحب يعبر
كي تشفاك العين ردي لي سلام...ضحكة منك كافة تطفي مجمر
جاهيتك باليوم عيدك من ذا العام... والثامن فالقلب نشفاه محفر
نعمي عيني ما نزيد نشوف اريام....ونكوي قلبي ما يحب ولا يذكر
نقطع يدي ما تزيد تدير سلام ...ونقطع رجلي ما تروح ولا تحضر
نعبد في خلوة ونقرا كاش زمام ...ونتعلم كيفاش في حبك نخمر
جلول قيايدة
ليست هناك تعليقات:
إرسال تعليق