حبك وجع
ولا كان معايا في يوم جدع
دايما واعدني بالفراق
والاشتياق زي طير مهاجر
في الهوى
ولا يوم بيرسى له في بر
عليل وصال ولا لاقي الدوا
حمة هواه في شتاه نار وحر
وانا كنت حر
كنت بسرح في عالي السما
وتداعبني النجوم
كنت خالي من الهموم
وكان يعدي عليا الف يوم
ولافارق سهر لعيني
ولا حتى نوم
كنت لما اشتاق لحاجه
واحبها في ثواني تبقي
ملك ايدي
انا كنت سيدي
سلطان لنفسي والدنيا سلطنه
كل مستحيلات الحياه كانت ممكنه
لما احب اسافر اغمض عيوني
والف كل الامكنه
اطلع سما واغوص في اعماق البحور
اضحك وابكي
واحضن سكاتي وسط الضجيج
وسعات كتير هدوئي بركان يثور
وقلبي الجسور لما عينه لمحت هواكي
داب زي سيل المطر وسط الثغور
نزلني حبك من السما
خلاني في دروب ارضك عمال ادوور
الخلاصه
مفيش شمعه بتنور طول الحياه
بيجي وقت وتنطفي
وتعيش ذكريات
وتموت ساعات
وترد تاني وتختفي
ياللي كنتِ للقا بتتلهفي
قلبي الوفي هيموت حزين
مدام السنين رضيت بقتله
وبتحتفي
هييجي يوم يا دمعه لعيوني وتتأسفي
وهتفرحي لما تلاقيني بودعك
علشان خلاص هفرح واعيش
اصل موتي بداية حياه
#الخلاصه٢٠١٩
ياسر ابراهيم
#ياسر_ابراهيم
ليست هناك تعليقات:
إرسال تعليق